ماہرہ خان کی نئی فلم ’ورنہ‘ کی پہلی جھلک

نامور پاکستانی اداکارہ ماہرہ خان کی نئی فلم ’ورنہ‘ کا پوسٹر ریلیز کردیا گیا جو رواں سال نومبر میں سینما گھروں کی زینت بنے گی۔
پاکستانی اداکارہ ماہرہ خان کی نئی فلم ’ورنہ‘ کی پہلی جھلک منظر عام پر آگئی اور ساتھ فلم کی ریلیز کا اعلان بھی کردیا گیا، فلم رواں سال نومبر میں سینما گھروں کی زینت بنے گی جب کہ فلم کی خاص بات یہ ہے کہ اس کی ہدایات شعیب منصور نے دی ہیں جوموجودہ پاکستانی فلم انڈسٹری کے بانی ہدایت کاروں میں سے ایک ہیں۔

شو مین پروڈکشنز کے بینر تلے بننے والی فلم ’ورنہ‘ کے رائٹر، ڈائریکٹر اور پروڈیوسر شعیب منصور ہیں جو ‘خدا کے لیے’ اور ‘بول’ جیسی سپرہٹ فلمیں شائقین کے لیے پیش کر چکے ہیں جب کہ فلم ’ورنہ‘ کی کہانی پاکستانی خواتین کے سماجی مسائل اور حقوق کی پامالی پر مبنی ہے۔
ایکسپریس کو دیئے گئے انٹرویو میں اداکارہ کا کہنا تھا کہ شعیب منصور کے ساتھ اداکاری کے شعبے میں قدم رکھا تھا اور ان پر مکمل اعتماد ہے وہ میرے لیے کوئی بھی کردار لکھیں میں اسے منع کرنے کی جرات نہیں کرسکتی۔

A post shared by Mahira Khan (@mahirahkhan) on Sep 1, 2017 at 4:04am PDT

دوسری جانب رواں سال عید کے علاوہ پاکستانی فلمیں خاطر خواہ بزنس نہ کرسکیں تاہم شعیب منصور کی واپسی سے شائقین اور ناقدین کی کافی توقعات وابستہ ہیں کیونکہ انہوں نے اپنی فلموں کے ذریعہ شائقین کو ہمیشہ با معنی پیغام دیا ہے۔
واضح رہے ماہرہ نے اپنے فلمی کیریئر کا آغاز بھی شعیب منصور کے ساتھ فلم ’بول‘ سے کیا تھا۔